ചെറുവാടി: കാൽപ്പന്ത് കളിയിലെ മലപ്പുറം വീറും സാംസ്കാരിക പൈതൃകവും ഒത്തുചേരുന്ന അസുലഭ രാവിന് ഇന്ന് പൊറ്റമ്മൽ സാക്ഷ്യം വഹിക്കും. നിഷാദ് മോൻ & സുൽഫിഖർ ബാവ മെമ്മോറിയൽ അഖില കേരള സെവൻസ് ഫുട്ബോൾ ടൂർണമെന്റിലെ ആവേശകരമായ ക്വാർട്ടർ ഫൈനൽ പോരാട്ടത്തിൽ ഇന്ന് ഫുട്ബോളിന്റെ ഈറ്റില്ലമായ മലപ്പുറത്തിന്റെ സ്വന്തം ടീമുകൾ നേർക്കുനേർ ഇറങ്ങുന്നു.
ഇന്ന് (ഏപ്രിൽ 06, 2026) രാത്രി 8:30 നടക്കുന്ന മത്സരത്തിൽ റഷീദ് എഫ് സി എടവണ്ണപ്പാറയും × അരുണോദയം കുനിയിലും തമ്മിലാണ് മാറ്റുരയ്ക്കുന്നത്. രണ്ട് ടീമുകളും മലപ്പുറം ജില്ലയിൽ നിന്നുള്ളവരായതിനാൽ ഇതൊരു 'മലപ്പുറം ഡാർബി' ആയാണ് ഫുട്ബോൾ പ്രേമികൾ നോക്കിക്കാണുന്നത്.
മലപ്പുറത്തിന്റെ തനതായ വേഗതയും അറ്റാക്കിംഗ് ഫുട്ബോളും ഇന്ന് പൊറ്റമ്മൽ നിഷാദ് മോൻ മെമ്മോറിയൽ ഫ്ലഡ്ലൈറ്റ് സ്റ്റേഡിയത്തിൽ കാണികൾക്ക് വിരുന്നാകും. കാൽപ്പന്തിനെ നെഞ്ചിലേറ്റുന്ന മലപ്പുറത്തിന്റെ കളിയാവേശം മുഴുവൻ ഇന്നത്തെ മത്സരത്തിൽ പ്രതിഫലിക്കുമെന്ന് ഉറപ്പാണ്.
കളിയാവേശത്തിന് മാറ്റുകൂട്ടാൻ മലപ്പുറത്തിന്റെ സാംസ്കാരിക അടയാളങ്ങളായ പ്രശസ്ത മാപ്പിളപ്പാട്ട് രചയിതാക്കൾ ഇന്ന് അതിഥികളായി ഗ്രൗണ്ടിലെത്തുന്നുണ്ട്. പ്രമുഖ മാപ്പിളപ്പാട്ട് രചയിതാക്കളായ സി. വി. എ. കുട്ടി ചെറുവാടിയും ടി. പി. അബ്ദുള്ളയുമാണ് ഇന്നത്തെ കളിയിലെ മുഖ്യാതിഥികൾ.
വേദിയിൽ സംഗീത പരിപാടികൾ ഇല്ലെങ്കിലും, മലപ്പുറത്തിന്റെ സിരകളിലോടുന്ന ഫുട്ബോൾ ലഹരിയും മാപ്പിളപ്പാട്ട് പെരുമയും പ്രതിനിധീകരിക്കുന്ന ഇവരുടെ സാന്നിധ്യം കളിക്കളത്തിന് കൂടുതൽ ആവേശം പകരും. ഇവരെക്കൂടാതെ അശോകൻ, സുധീർ പരവരിയിൽ, ബീരാൻകുട്ടി എന്നിവരും ഇന്നത്തെ കളി കാണാൻ വിശിഷ്ടാതിഥികളായി എത്തും.
രാത്രി 8:30 ൻ ചെറുവാടി, പൊറ്റമ്മൽ നിഷാദ് മോൻ മെമ്മോറിയൽ ഫ്ലഡ്ലൈറ്റ് സ്റ്റേഡിയത്തിലാണ് മത്സരം കിക്കോഫ് ചെയ്യുന്നത്. മലപ്പുറത്തിന്റെ ഫുട്ബോൾ പാരമ്പര്യവും കൂട്ടായ്മയും വിളിച്ചോതുന്ന ഈ കായികമാമാങ്കത്തിനായി ആവേശത്തോടെ കാത്തിരിക്കുകയാണ് ഫുട്ബോൾ ആരാധകർ.
